موضوع: مفيش حاجة للشاعرة إيمان البكرى الإثنين مارس 16, 2009 4:26 pm
مانيش عايزة خلاص حاجه ولا محتاجة انا لحاجه ولو عايزة صحيح حاجه مخليتوليش ولا حاجه
عموماً بصوا فيه حاجه هقولها بس محتاجه لعقول تفهم ولو حاجه ماهيش مفهومه او حاجه نفسرها بكام حاجه نوضحها بكام حاجه وأهى حاجه مع حاجه هتظهر وتبانلنا حاجه وانا ما بخفش من حاجه مانيش مسنوده ولا حاجه لكن ما بخفش من حاجه لكن فرضاً لو هقول حاجه هيحصل إيه ؟؟؟ ولا حاجه هيعملوا إيه ؟؟ ولا حاجه و بعد الشر بعد الشر لو واحد من القاعدين من السامعين من الضالين فِهِم حاجه هَيعملوا إيه ؟؟؟؟ اكيد برضُه ولا حاجه فنتوكل على الستار لوجه الله نقول حاجه فيه ناس بتعيش عشان حاجه وناس بتموت عشان حاجه وناس بتموت على الحاجه وناس تديلك الحاجه وتبقى ليها محتاجه وناس تديلك الحاجه و تاخد أٌدامها ميت حاجه وناس تكبر تكون حاجه و ناس تصغر عشان حاجه وناس منظر ومش حاجه وتلقاه كبير حرس ونفير عليه منظر وهو جبان وشيخ منصر ولا يبـانش عليه حاجه
كلامى يا خلق فيه حاجه؟ لحد دلوقتى فيه حاجه؟ كلام عادى وبسيط جداً ولا فِهشِ ولا حاجه ما انا ما أقدرش أقول حاجه صحيح نفسى أقول حاجه وميت حاجه لكن مش قادرة اقول حاجه لأنى لو هقول حاجه هييجى ناس بتوع حاجه وياخدونى ورا الحاجه وهو لو سمع حاجه هيعملوهالى ميت حاجه
عموما بصو لو واحد من القاعدين عاوزنى أبلغه بحاجه يقول مايخفش من حاجه
نعم فيه إيه؟ لالالالالأ مافيش سرقه ولا تهليب ولا تهريب ولا حاجه
وبتقول إيه مصمصوا إيه؟ وخصخصوا إيه؟ ده كله كلام مفيش حاجه
قضية إيه؟ ياشيخ روح خلاص مافيش حاجه
حرامى إيه ؟ ولَكّح إيه؟وهرب إيه؟ شــفـافـيـه ومافيش حاجه
وبتقول إيه؟ لالالآلأ عـــيب لا فيه تدليس ولا ترقيص ولا تدبيس ولا حاجه
سمع هووووس انا حاسة انه فيه حاجه
دقيقة سكات لَتبقى حداد انا حاسه انه فيه حاجه
زمنكوا ياخلق فيه حاجه ولازموا كام وميت حاجه ده لو يعنى إذا كان فيه حاجه انا عن نفسى مش حاسة ولا بحاجه ولا متضايقة ولا حاجه
موضوع: مفيش حاجة للشاعرة إيمان البكرى 
الإثنين مارس 16, 2009 4:26 pm
